عبد الرحمان زيطوط * عادات الاسرة الجزائرية ليلة المولدالنبوي الشريف*
بادئ ذي بدا احيكم طبتم وطاب مقامكم حبيت نتكلم على عادات الاسر الجزائرية ليلة المولد واش يديرو ؟ وش يوجدوا ؟ واش يعملوا ؟ المهم نبدا
ياسيدي معلوم ان بلادنا هايلة ورايعة ومليحة ولافخر وماكانش لي يشك في هذا واحنا اسرة وحدة دينا واحد وتاريخنا واحد و....الخ والجزائر تجمعنا كلنا ندخلو في الموضوع .
قبل ايام ليلة او ليلتين قبل الميلود تنظف العايلات الجزائري ارض ديارهم وحيطانها واثاثها وتستعد للاحتفال بالمناسبة السعيدة ايواه يالي هي ميلاد رسولنا -صلى الله عليه وسلم-
صبحة ليلة الميلود ينوض رب الاسرة بكري رافد معها القفة والصوارد في جيبوا يادرا وين رايح صاحبنا ؟
ايواه ياسيدي راه هابط للبلاد قصدي المرشي ويبداء يشري اللوازم هذا دجاج وهذي خضرة وفاكهة و القازوز والجيي . زيد البيتزا والباتيسري حبة كبيرة ومليحة تكفي قاع العايلة ايواه ومن بعد كمل الطريق تديه للدار .
هاي لحقت العشوة وقرب المغرب ايواه اذن اذان العشاء احنا الرجالة نروحو ا للجامع نحضروا الحفلة هذاه صلاة المغرب ياسيدك ومن بعدها قراءة حزب ولا زوج من بعدها ياخوي قصائد في مدح الرسول -صلى الله عليه وسلم- ابدها من البردة والهمزية وزيد ...الخ
كلمة للامام وكلمة لبعض من الشخصيات الدنيية حول سيرة المصطفى واثاره و نصايح عامة
.ايواه من بعد يوزع المشروبات والحلويات والكاوكاو والتاي وزيد لي حضرت انصلوا العشاء ونختموا الحفلة ولعقوبة العام الجاي انشاء الله.
نرجعوا للدار وين نلقاوا العايلة ملمومة من كبيرها لصغيرها الجد الجدة الام البنات الاخوات الابناء ......الخ
نبدا في العشاء مع بعض ومن بعد الدسير والزردات البتيسري والبيتزا الجبن لاتاي الكوكاو الحلويات المشروبات والقازوز لي حبوا راه حاضر زيد حلاو الترك .....الخ
ورها القصرة ساعة ولا زوج مع العايلة ومن بعد انوضوا احنا الرجالة انكملوا القصرة برة مع لصحاب ولحباب ونخلوا النساوين مع بعضهم والاطفال دايرين فوضة الداخل وبرا المهم والفايدة الله يجعلها مناسبة سعيدة علينا وعليكم ونحمدوا الله على اننا مسلمين و انوا رسولنا محمد -صلى الله عليه وسلم -
والحمد لله رب العالمين كاتب الموضوع : عبد الرحمان زيطوط